الشمالي مهاجر صاحب الموقع
عدد المساهمات : 272 تاريخ التسجيل : 10/02/2010
| موضوع: من ارشيف ابو عوض السبت فبراير 13, 2010 8:38 pm | |
| الاخ العزيز قلب المضيان طلبك اوامر ونشالله مانبخل بمانستطيع من طرحه لهاذا المنتدى بخصوص قصيدة والدي بوالدتي هي ماهي قصيده بل مساجلات بينهما اسال الله الرحمه لحيهم وميتهم كان علينا وقت اقشر والبعارين اضعاف والغنم ايضا ماتجد الجلابه اللي تجمل راعيها بالسوق وكانت والدتي مريضه ومحتاجه علاج والعلاج بفلوس فاقرر والدي عجاج رحمة الله عليه ان يبيع البندق وكان معه ام عريف انقليزيه ماتاكل راس الفشقه وليامدها اخو امغيضه ماتخطي الضريبه وغاليه عنده ولكن قرر بيعها وباعها على شخص حضري فلما قاله الشاري ارم المحزم رما المحزم وتطافرن دموعه رحمة الله عليه المهم عالج امي وفي ذيك السفره شرى لها دبشيه وهي الجحه وقال
يام القبيسي شرينالك = عقب الغدى خوش دبشيه
الله يخليك لعيالك = ونتي يفكك من السيه
فاردة العاجوز وقالت
كبدي بها لاهب لاجاك = وتوهج الشر مع روحي
لاواهني من بري وجازاك = يافضي البال وسموحي فلما بريت وتعافت ازعلته ووصل الزعل لاحد الطلاق بسبب كلمه تافهه
وكانت امي يتيمه ولالها ضل غير الله وابوي
فاتراضو وجابت العيال زياره عليه وطاحو على راسه وحبوه ورضي يوم رضي سالها قال وشلون قصيدتك اللي تقولين لاواهني من بري وجازاك = يافضي البال وسموحي فاخبرته بها قال انا رديت عليك
اقول
القيض كله ونا ابرالك = ويبست انا يبسة القده
وبعت التفق زاد من شانك = ياريحة المسك والنده
ويوم تنشطة حالك = وصل الجزى منك يامحده
والله يلو ماني اضلالك = لاغير ازهبك للمده
بخصوص قصيدته رحمه الله بهل الخرج
يسند على اشنان الخميس يقول
الخرج نزالته كرخان = ياشنان ياسعد عانيهم
رجالهم يفتح الدزدان = ومن الحيل تنسف يمانيهم
وله ايضا بهل الخرج
شفي دويرع مع الخرجي = وحمراء كما هارف الذيبي
تسري وتصبح هل الخرجي = اهل الندى منقع الطيبي
ودوارة الطيب بالهرجي = ماحطهم لي معازيبي
بخصوص مساجلتي انا وبن شنين رحمه الله كنا على عزيمه وقاعدين على الصحن ننضر قولت سمو وهو مايمد يده وشوف يقطعون من الفرفاشه ويعطونه فاعطيته من اللحم قال لا ماقدر اكل لحم قلت ليه قال الطبيب مانعني عن اللحم يقول بس الفرفاشه والكبد وتخبر الرجال الياكبروفي ذيك الايام تونا جايين الخرج من غزو صدام
قلت انا
انتي وضحى باول غوش = عليها زعل وغباشه
تري الرجال الياكبر = يصلح ماكوله فرفاشه
قال شريده ابن شنين
انتي وضحى المصاليح = مع اول قوم منحاشه قلت انا
جينا وخلينا ديرتنا = عز اللي يدور العاشه
حرمها علينا صدام = الله يحرم مهاشه
اجنوده مثل العفاريت = كل في كتفه رشاشه
قال شريده
تسمع رزيز المدافع = بيدين اربوع هواشه
قال المعزب سمو والعنو الشيطان وحنا نسمي حنا بهالحكي على الصحن رحمة الله على ذيك الروح الطاهره ياخو الدهمى ونعم الرجل راعي العبدى
اتمنا لمكم المتعه والسعاده ودمتم بود | |
|
اميرة الوارد عضو نشيط
عدد المساهمات : 45 تاريخ التسجيل : 12/02/2010
| موضوع: رد: من ارشيف ابو عوض الأحد مارس 07, 2010 3:47 pm | |
| القيض كله ونا ابرالك = ويبست انا يبسة القده
وبعت التفق زاد من شانك = ياريحة المسك والنده
ويوم تنشطة حالك = وصل الجزى منك يامحده
والله يلو ماني اضلالك = لاغير ازهبك للمده القيض كله ونا ابرالك = ويبست انا يبسة القده
وبعت التفق زاد من شانك = ياريحة المسك والنده
ويوم تنشطة حالك = وصل الجزى منك يامحده
والله يلو ماني اضلالك = لاغير ازهبك للمده القيض كله ونا ابرالك = ويبست انا يبسة القده
وبعت التفق زاد من شانك = ياريحة المسك والنده
ويوم تنشطة حالك = وصل الجزى منك يامحده
والله يلو ماني اضلالك = لاغير ازهبك للمده
القيض كله ونا ابرالك = ويبست انا يبسة القده
وبعت التفق زاد من شانك = ياريحة المسك والنده
ويوم تنشطة حالك = وصل الجزى منك يامحده
والله يلو ماني اضلالك = لاغير ازهبك للمده
يسلموووووووووووووو اخوي ويعطيك الف عافيه على مجهودك
| |
|
الوافي عضو نشيط
عدد المساهمات : 26 تاريخ التسجيل : 24/02/2010
| موضوع: رد: من ارشيف ابو عوض الإثنين مايو 24, 2010 6:19 pm | |
| يسلمووووو اخوي ويعطيك الف عافيه ماننحرم من جديدك | |
|